Одлука о националних символох єдногласно принєшена на остатнєй схадзки Националного совиту Руснацох, и предлог тей одлуки будзе послати на конєчне верификованє до Влади Републики Сербиї и Републичному совиту за национални меншини
Мож повесц же 14. априла, Национални совит Руснацох принєсол историйну одлуку за нашу националну заєднїцу – одлуку о националних символох Руснацох у Сербиї. Национални символи єдней националней заєднїци подрозумюю герб, заставу и националне швето, а нєзависно од державних орґанох, Национални совит може принєсц и одлуку о шветочней шпиванки (нє гимни). Одлука о националних символох на схадзки у Руским Керестуре принєшена єдногласно, и будзе прешлїдзена Влади Републики Сербиї, односно Републичному совиту за национални меншини на конєчне верификованє.

Попри предлогу одлуки, Влади и Републичному совиту буду послати и толкованя за предложених символох Руснацох у Сербиї, у котрих ше гвари:
Герб змесцени до класичного штироуглого щиту французкого типа и подзелєни є на два основни поля котри го з вертикалну осу, од глави ґу бази, дзелї на два поля. На його правей половки приказани медведз основней червеней, односно цмей червеней фарби у стояцим положеню котри патри на прави бок. Спрам єдного толкованя, медведз стародавни славянски символ котри Русинох/Руснацох вяже за їх праотечество у Карпатох. Друга половка герба подзелєна на седем єднаки горизонтални поля на котрих ше зменюю пантлїки белавей и жовтей (златней) фарби.
Спомнути символ 30. марца 1920. року постал урядови герб автономней єдинки у составе Чехословацкей (1919–1938). Спрам даєдних толкованьох, на тим символу пантлїки белавей фарби означую штири комитати, односно жупаниї (Унґ, Береґ, Угоча и Мараморош), котри вошли до составу спомнутей обласци, а три златно-жовти пантлїки – три златоносни рики з тей обласци (Уж, Латорица и Тиса).
Комбинованє белавей и жовтей фарби вшелїяк присутна и у ознакох вецей жупанийох, односно комитатох подкарпатскей (закарпатскей) обласци, а у историйним смислу, белаво-златна комбинация и ознака Рюриковича, владарского дому Києвскей Руси, першей штредньовиковней держави Восточних Славянох, односно Русинох.
У каждим случаю, без огляду на историйни контексти, односно пременку историйних гранїцох, вон символ обласцох зоз котрих ше доселєло вельке число предкох тутейших Руснацох, та и найвекша часц од 200 фамелийох, котри на тото мали право спрам Контракта хтори подписал совитнїк царици Мариї Терезиї и администратор Кральовско-державного Бачкого дистрикту у Зомборе, 17. януара 1751. року.
Нєшка тот герб представя общеприлапени знак векшини русинских орґанизацийох ширцом швета (Словацка, Чска, Польска, Україна, Мадярска, Румуния, Горватска, Сербия, Нємецка, ЗАД, Канада...) Вон препознатлїви знак и часц идентитета шицких Русинох/Руснацох, без огляду на їх националну ориєнтацию и реґионалну припадносц.
Його историят и применьованє, заправо злучую тоти ориєнтациї и окремносци, односно, допущую найвекшому числу Русинох/Руснацох же би го прилапели як свой, без огляду на їх доживйованє националного идентитета и питаня матичней жеми, гвари ше у толкованю одлуки-предлога за герб Руснацох у Сербиї.

На основи одлуки Националного совиту, за заставу Руснацох, до Влади Републики Сербиї будзе послате шлїдуюце толкованє:
У случаю Руснацох у Сербиї, герб положени на сербску трофарбнїцу – на заставу Републики Сербиї. През тото злученє, витворена єдинствена символика – у нїм виражена ґеоґрафска и психолоґийна припадносц Руснацох держави Сербиї и традицийного заєднїцтва з державотворним народом, а источасно и нєспорна вязаносц за историйни край свойого походзеня - поведзене у толкованю застави.
Националне швето Руснацоих у Сербиї будзе 17. януар, а толкованє за тот датум шлїдуюце:
- Тот дзень представя здогадованє на 17. януар 1751. року, кед Франц Йозеф де Редл, совитнїк царици Мариї Терезиї и администратор Кральовско-державного Бачкого дистрикту у Зомборе подписал перши урядови документ – Контракт о насельованю 200 руских греко-католїцких фамелийох на тедишню пусту Вельки Керестур. Тот дзень уж вецей децениї прилапени як дзень урядового досельованя Руснацох на тоти простори, гвари ше у толкованю Националного совиту котре будзе послате на верификованє.
Можлїве же Руснаци у Сербиї буду мац ище єден дзень як свойо националне швето (як то случай и при других националних заєднїцох у Сербиї), котре би обєдиньовало духовни и шветовни змисти, о чим до тераз на вецей заводи бешедоване з найвисшима достойнїками Апостолского еґзархата за грекокатолїкох у Сербиї.

Нєзависно од компетентних державних орґанох, Национални совит може принєсц и одлуку о шветочней шпиванки (нє гимни), тиж як єдней з ознаки националней заєднїци. Так за шветочну шпиванку були предложени три композициї: “Руски Керестур (Руснак)”, композитора Михала Бодянца, “ З давен давна” Агнети Тимковей и “Браца Русини” Иринея Тимка.
О можлївосцох же би даєдна з нїх була шветочна шпиванка консултовани и фаховци з тей обласци, та и на основи того, на Националним совиту дефиноване же би ше за два шпиванки - “З давен давна” и “Браца Русини” виробело окремни аранжмани, а же композиция “Руски Керестур (Руснак)” мелодийно нє одвитує потребом за шветочну шпиванку.
Виробок аранжманох за оркестер найвироятнєйше будзе понукнуте нашим двом фаховцом з обласци музики – Мироньови Сивчови и Юлиянови Рамачови Чамови. Аранжмани би мали буц виробени по Фестивал култури “Червена ружа”, кеди тоти композициї буду и виведзени з нову гармонию, же би аж после того Национални совит принєсол одлуку о шветочней шпиванки. Кед же анї єдна з нїх нє будзе одвитовац за тоту намену, постої можлївосц розписованя явного конкурса за текст и мелодию шветочней шпиванки Руснацох у Сербиї.
Ґу тому, на схадзки Националного совиту заключене же би ше на наш язик преложело и присподобело общерусинску гимну “Я Русин бул” Александра Духновича, лєбо прилапело даєден з дотерашнїх прекладох текста тей шпиванки.

ИСТОРИЙНА ТРАДИЦИЯ

Описани герб ма свою историйну традицию – його зявенє мож спатрац у шветлє културно-националного руху Русинох у дакедишнєй Австро-Угорскей: по законченю Першей шветовей войни, новоформованей Чехословацкей Републики були припоєни етнїчни краї у подкарпатскей обласци бувшей Угорскей, котри формовали аутономну обласц Подкарпатска Рус зоз шедзиском у Ужгородзе.


ГЕРБ СИМВОЛ ЗАКАРПАТСКЕЙ ОБЛАСЦИ

После Другей шветовей войни, 1945. року, Подкарпатска Рус, под урядовим меном Закарпатска обласц, уходзи до составу Українскей Совєтскей Републики тедишнього СССР. Од 18. децембра 1990. року тот герб и формални символ Закарпатскей обласци України и таки остал и до нєшкайшого дня у рамикох Українскей нєзависней держави.


ЗАВИТНИ ДЗЕНЬ У ВОДИЦИ НАЦИОНАЛНЕ ШВЕТО

У дотерашнїх розгваркох, як предлог за тото швето споминани Треци дзень Русадльох, односно Завитни дзень у Водици и 9. май, як Дзень Еґзархату, цо и родзени дзень керестурскей Соборней церкви (Кирбай у Керестуре), а источасно то и дзень Побиди над фашизмом и Дзень Европскей униї.
Медзитим, зоз Еґзархату ище вше нє достате конєчне опредзелєнє о тим заєднїцким датуме за шицких тутейших Руснацох, и кед же по формованє Влади РС предлог зоз церкви будзе дефиновани, тиж будзе послати на одлучованє до Републичних орґанох.